ഇന്ത്യയിൽ ആദ്യമായി പക്ഷികളെ ബാധിക്കുന്ന മാരക വൈറസിന്റെ സാന്നിധ്യം റിപ്പോർട്ട് ചെയ്തു. പാരറ്റ് ബോർണവൈറസ് 4 (PaBV-4) എന്ന വൈറസിനെയാണ് വെറ്ററിനറി സംഘം കണ്ടെത്തിയത്.വൈറസ് പക്ഷികളുടെ നാഡിവ്യവസ്ഥയെ ബാധിക്കുകയും ദഹന അവയങ്ങളെ പ്രവർത്തനത്തെയും ബാധിക്കുന്ന രോഗമായ പ്രൊവെൻട്രിക്കുലാർ ഡിലേറ്റേഷൻ ഡിസീസിന് (PDD) കാരണമാകുമെന്ന് ഗുവാഹത്തിയിലെ അസം വെറ്ററിനറി ആൻഡ് ഫിഷറി യൂണിവേഴ്സിറ്റി.
2020 മുതൽ 2024 വരെയുള്ള കാലഘട്ടത്തിൽ ലൗബേർഡ്, പാരക്കീറ്റ്, ബഡ്ജി തുടങ്ങി 83 പക്ഷികളിൽ നിന്ന് സംഘം സാമ്പിളുകൾ ശേഖരിച്ചു. അസം, പശ്ചിമ ബംഗാൾ, കർണാടക എന്നിവിടങ്ങളിലെ പക്ഷികേന്ദ്രങ്ങളിൽ നിന്നാണ് സാമ്പിളുകൾ ശേഖരിച്ചത്. ആഫ്രിക്കൻ ഗ്രേ പാരറ്റ്, യെല്ലോ - കോളർ മാക്കാവു പോലുള്ള വിദേശ ഇനങ്ങളിലാണ് PDD രോഗം കൂടുതലായും പിടിപ്പെടുന്നത്.
അമേരിക്ക, കാനഡ, ഇസ്രയേൽ, ജപ്പാൻ, ദക്ഷിണ കൊറിയ എന്നിവിടങ്ങളിൽ റിപ്പോർട്ട് ചെയ്ത PaBV-4 വകഭേദത്തോട് സാമ്യം പുലർത്തുന്ന വകഭേദമാണ് ഇന്ത്യയിലും റിപ്പോർട്ട് ചെയ്തിരിക്കുന്നത്. ജനിതകവ്യതിയാനം സംഭവിച്ചിട്ടില്ലെന്നത് ശ്രദ്ധേയമാണ്. നിയമപരമായും അല്ലാതെയും അതിർത്തി കടന്നെത്തുന്ന പക്ഷികളിലൂടെയാണ് രോഗബാധ പകരുന്നത്. വംശനാശം സംഭവിക്കുന്ന പക്ഷികൾക്ക് ഭീഷണിയാണ് പുതിയ വൈറസ്.