തിരുവനന്തപുരം: ദില്ലിയിലെ വിദ്യാർഥി പ്രക്ഷോഭത്തിൽ കേന്ദ്ര സര്ക്കാര് സ്വീകരിക്കുന്ന നിലപാടിലും പൊലീസ് നടപടിയിലും പ്രതിഷേധിച്ച് നാളെ (23-07-2026) വിദ്യാഭ്യാസ ബന്ദിന് ആഹ്വാനം ചെയ്ത് സിപിഐയുടെ വിദ്യാർഥി സംഘടനയായ എഐഎസ്എഫ്. നേരത്തെ കോൺഗ്രസിന്റെ വിദ്യാർഥി സംഘടനയായ കെഎസ്യുവും ബന്ദിന് ആഹ്വാനം ചെയ്തിരുന്നു. നീറ്റ് പരീക്ഷയുടെ ക്രമവിരുദ്ധമായ നടത്തിപ്പിനെതിരെ സമരം ചെയ്ത പ്രതിപക്ഷ നേതാവ് രാഹുൽ ഗാന്ധി ഉൾപ്പെടെയുള്ള എംപി മാരെ കയ്യേറ്റം ചെയ്ത സംഭവത്തിലാണ് കെഎസ്യു ബന്ദിന് ആഹ്വാനം ചെയ്തത്. സംസ്ഥാന വ്യാപകമായി വിദ്യാഭ്യാസ ബന്ദ് ആചരിക്കുമെന്ന് കെഎസ്യു സംസ്ഥാന പ്രസിഡന്റ് അലോഷ്യസ് സേവ്യർ ആഹ്വാനം ചെയ്തു. മുഴുവൻ ക്യാമ്പസുകളിലും നരേന്ദ്ര മോദിയുടെ കോലം കത്തിച്ച്, ക്ലാസ്സുകൾ ബഹിഷ്കരിച്ചു രാജ്യത്തെ വിദ്യാർത്ഥികൾക്ക് പിന്തുണ നൽകണമെന്ന് കെഎസ്യു അഭ്യർഥിച്ചു. ജില്ലാ കേന്ദ്രങ്ങളിലും പ്രതിഷേധ പ്രകടനങ്ങൾ സംഘടിപ്പിക്കും.